د ملګرو ملتونو د بشري حقونو څارونکي ادارې ویلي چې په میانمار کې د بشري حقونو وضعیت چې له وړاندې نه خراب و، اوس "نوې کچې ته رسیدلی" دی. دغه اداره په خپل تازه راپور کې چې د ۲۰۲۵ کال د جون له لومړۍ نیټې څخه تر ۳۱ مې پورې د پیښو په اړه دی، د روهینګیا اقلیت پر وړاندې "وحشیانه او ورځنۍ سوء استفاده" او د غیر قانوني اقتصادونو "ویرانګر تاثیر" په ځانګړي ډول د نادره عناصرو غیر قانوني استخراج، محکوم کړي دي.
د فرانس پریس خبري اژانس د ولکر ترک، د ملګرو ملتونو د بشري حقونو د کمیشنر له قوله راپور ورکړی چې دغه راپور د میانمار په مختلفو برخو کې د خلکو د رنځ، بدبختۍ او بې رحمۍ انځور وړاندې کوي. ترک له ټولو هېوادونو، شرکتونو او پانګوالو غوښتنه کړې چې د خپلو کړنو او یا د نه کړنو په اړه ژور غور وکړي او له ځان څخه پوښتنه وکړي چې آیا دا د میانمار خلکو لپاره عادلانه او منصفانه دی؟
د ملګرو ملتونو راپور کې د نظامي ځواکونو لخوا د ملکي خلکو پر وړاندې د خشونتونو یادونه شوې او ویل شوي چې د میانمار پوځ د ویرې او کنټرول د رامنځته کولو لپاره نوې ټیکنالوژي کاروي چې د خلکو په ژوند کې یې منفي اغیزه کړې ده. راپور همدارنګه وایي چې غیر قانوني اقتصادونه د میانمار په جګړو کې د مالي ملاتړ سبب کیږي او د بشري حقونو بحران د غیر قانوني کان کیندنې، د مخدره توکو تولید او د انسانانو قاچاق له امله زیات شوی دی.
د میانمار نظامي حکومت د ۲۰۲۱ کال د فبرورۍ په لومړۍ نیټه د یوه کودتا له لارې واک ته رسیدلی او د آنگ سان سوچي منتخب حکومت یې له واکه لرې کړی. دغه اقدام د میانمار د ۱۰ کلنې دموکراسي تجربې ته پای ورکړه او دغه هېواد یې د وینې په ګډوډۍ او بشري بحران کې واچوه. په تېرو پنځو کلونو کې، د میانمار پوځ د دموکراسي غوښتونکو او قومي اقلیتونو سره جګړه کړې، چې په دې جګړو کې تر ۱۰۰ زرو زیات کسان وژل شوي دي.
د فرانس پریس د راپور له مخې، مین آنگ هلاینگ، چې د کودتا مشر دی او په اپریل کې د میانمار د ملکي ولسمشر په توګه اعلان شوی، د وسله والو ځواکونو قومانداني یې یوه لوړ پوړي مرستیال ته سپارلې او اوس د دیپلوماتیکو هڅو مشري کوي ترڅو د میانمار د انزوا وضعیت بدل کړي. هند، چین، لائوس او تایلند د هغه د سفرونو پر مهال له هغه سره هرکلی کړی، چې دا اقدام د بشري حقونو فعالانو له سختو نیوکو سره مخ شوی دی.
موضوع: په میانمار کې د بشري حقونو وضعیت
سرچینه: Azadi Radio جهان
