د چین په ختیځ او جنوب ختیځ ساحو کې د «دلفین سپین» طوفان له راتګ سره، له یوه میلیونه زیات خلک له خطرناکو سیمو څخه تخلیه شول. د رویټرز خبري اژانس د چین د هوا پېژندنې ادارې په حواله راپور ورکړی چې دغه طوفان د ۱۸ اسد په ورځ د چین ختیځ او جنوب ختیځ ساحو ته ورسېد او لا هم روان دی.
دا طوفان د شدیدو بادونو او سیلابي بارانونو سره مل و، چې د سیلاب او ځمکني لغزش خطرونه یې هم راپورته کړل. کله چې طوفان د ۱۵۱ کیلومتره په ساعت سرعت سره چین ته ورسېد، ۹۰۰ زره خلک له ونژو ښار څخه چې په ژجیانګ ایالت کې دی، خپلو کورونو څخه تخلیه شول او تر ۱۰۰۰ زیات پناه ځایونو ته لیږدول شول.
سربیره پر دې، ۹۹ زره کسان په فوجیان کې هم تخلیه شول او په شانګهای کې ۱۵۰۰ الوتنې لغوه شوې. د کښتۍ چلونې او بندرونو فعالیتونه په شدت سره محدود شول، او د ژجیانګ، شانګهای، آنهویی او جیانګسو ایالتونه د شدید بارانونو سره مخ شول.
دا طوفان مخکې له دې چې چین ته ورسېږي، په جاپان کې هم تیریدو سره لږ تر لږه شپږ کسان ټپیان کړل. تایوان هم د دې طوفان له اغیزو څخه خالي نه و، که څه هم د دلفین سپین طوفان په تایوان کې نه دی ورغلی، مګر د تایوان ساحلي اوبو ته یې زیان رسولی دی.
تر دوشنبې ورځې (۱۹ اسد) پورې، د دلفین سپین طوفان لا هم د چین مرکزي او لویدیځو سیمو ته روان دی. وانګ هایپینګ، د ملي هوا پېژندنې مرکز مشر، په چینایي دولتي تلویزیون کې ویلي چې طوفان به لویدیځ ته لاړ شي او وروسته به په مرکزي او جنوب لویدیځ چین کې کمزوری شي. هایپینګ همدارنګه ویلي چې دا به د شدید باران دوامداره کړي او د سیلاب او ځمکني لغزش خطر به زیات کړي، په ځانګړي توګه په غرني سیمو کې.
موضوع: چین کې د دلفین سپین طوفان
سرچینه: روزنامه اطلاعات روز
