د امریکا د عدلیې وزارت اعلان کړی چې د ۴۰ کسانو د امریکايي تابعیت د لغوه کولو لپاره یې قضیې ثبت کړې دي، چې په دې کې دوه افغانان هم شامل دي. د وزارت په خبرپاڼه کې چې د تلې په ۲۱مه خپره شوې، ویل شوي چې دغه کسان د جرمونو په ترسره کولو، د تابعیت د ترلاسه کولو په بهیر کې د ناسم معلوماتو ورکولو او د مهمو معلوماتو پټولو تورن دي.
د نوملړ په کې واریس جان صافی، چې ۵۵ کلن دی، او اسد جان رامین، چې ۵۷ کلن دی، شامل دي. د نیویارک د محکمې د اسنادو له مخې، صافی په ۱۹۹۵ کال کې د طارق محمود په نوم د پاکستان د جعلي پاسپورټ په کارولو سره امریکا ته ننوتی و. د چارواکو په وینا، د هغه هویت افشا کېدو وروسته، صافی د بېلابېلو هویتونو په جوړولو او واده کولو سره د استوګنې اجازه او وروسته امریکايي تابعیت ترلاسه کړ.
بلې خوا، اسد جان رامین چې په پنسلوانیا کې ثبت شوی، تورن دی چې نژدې ۳۰ کاله مخکې یې د یوه بل افغان وګړي هویت کارولی او د کډوالۍ امتیازات ترلاسه کړي، چې وروسته یې امریکايي تابعیت ترلاسه کړی دی.
د امریکا د عدلیې وزارت ویلي چې د دغو کسانو قضیې به محکمې ته ولېږل شي. په دې نوملړ کې د مکسیکو، پاکستان، ایران، هند، فلیپین، بریتانیا، وینزویلا او کیوبا وګړي هم شامل دي.
موضوع: د دوو افغانانو د تابعیت لغوه کول
سرچینه: Azadi Radio Pashto NEWS
