د طالبانو د حکومت د امربالمعروف او نهی عن المنکر محتسبانو له لوري د ښځو او نجونو رواني امنیت ته زیان رسېدلی دی. دغه ښځې وایي چې د طالبانو ادعا چې سراسري امنیت یې ټینګ کړی، د دوی لپاره کافي نه ده. د کابل یوه اوسېدونکې چې نه غواړي نوم یې خپور شي، ازادي راډیو ته وویل چې د طالبانو د محدودیتونو له وېرې په خفګان او تنګه فضا کې ژوند کوي. هغې زیاته کړه چې نه یوازې پوهنتون کې له زده کړو راګرځول شوې، بلکې د جامو د انتخاب په اړه هم د طالبانو د پالیسو له امله له اندېښنو سره مخ ده.
دې ښځې وویل: "کله چې یوه ښځه نه پوهېږي چې د لباس د څرنګوالي او له کوره بهر تګ راتګ له امله به ورسره څه ډول چلند وشي، نو د ارامۍ احساس نه شي کولای. ډېری ښځې چې کله کوره وځي، دا فکر لري چې ایا لاره کې به خوندي وي یا نه؟" د کابل نه علاوه، د ځینو نورو ولایتونو ښځې هم ورته اندېښنې لري.
د خوست یوه اوسېدونکې نجلۍ چې له ښوونځي راګرځول شوې، وویل: "ښایي جګړې ختمې شوې وي، خو موږ ښځې او نجونې لا هم د ذهني او فزیکي امنیت احساس نه لرو. د بیان ازادي نه لرو او د زده کړې او کار اجازه هم نشته." د کندهار یوه ډاکتره هم د نوم نه خپرولو په شرط وویل چې حقیقي امنیت هغه وخت رامنځته کېږي چې ښځې د ذهني ارامتیا، کار، او زده کړو لپاره مناسب فرصتونه ولري.
د طالبانو حکومت د ښځو او نجونو حقونه د اسلامي شریعت په چوکاټ کې خوندي کړي، خو ښځې د دې ادعاوو سره موافقې نه دي. په هرات کې د امربالمعروف محتسبانو له لوري د حجاب نه مراعاتولو په تور د ښځو نیول هم د دې اندېښنو د زیاتېدو لامل شوی دی. د طالبانو حکومت د بیا واکمنېدو وروسته د نجونو پر زده کړو او کار بندیزونه لګولي، چې د ښځو رواني امنیت ته زیان رسوي.
ارواه پوهان وایي چې د ذهني او رواني امنیت پرته فزیکي امنیت بشپړ نه دی. د ارواه ډاکتر جاوېد رحیمي په وینا، امنیت هغه وخت بشپړ کیږي چې د ټولنې او کور په دننه کې د ټولو وګړو حقونه خوندي وي. هغه ښځو ته مشوره ورکوي چې د خپلو اندېښنو او احساساتو په اړه د باور وړ کسانو سره خبرې وکړي او د زده کړو او مهارتونو په پرمختګ کې هڅه وکړي.
موضوع: د طالبانو محدودیتونه د افغان ښځو رواني امنیت ته زیان رسوي
سرچینه: Azadi Radio Pashto Reports
