جاپان او ملګرو ملتونو د ۹.۴ میلیونو امریکايي ډالرو په ارزښت د افغانستان په کچه د نشهيي توکو پر وړاندې د مبارزې لپاره یوه نوې همکاري پیل کړه. دغه تړون د جاپان د نړیوالې همکارۍ ادارې (جایکا) او د ملګرو ملتونو د مخدره توکو او جرمونو په وړاندې مبارزې دفتر (یو اېن او ډي سي) ترمنځ لاسلیک شو.
د دې همکارۍ هدف د هغو ټولنو ملاتړ دی چې د ناقانونه کښتونو، بېوزلۍ او د نشهيي توکو د کارونې له منفي اغېزو سره مخ دي. د «نشهیي توکو پر وړاندې د مبارزې د وړتیاوو د پیاوړتیا» په نوم پروژه به د ۲۰۲۶ کال د سپټمبر میاشتې نه تر ۲۰۲۸ کال پورې په بدخشان، بادغیس، تخار، کندهار او هلمند ولایتونو کې پلې شي.
د دې پروژې له لارې به د دوامدارو بدیلو معیشتي فرصتونو د رامنځته کولو له لارې هغو کلیوالو ته اقتصادي مرسته وشي چې مخکې یې د کوکنارو د کښت په عاید تکیه کوله. د طالبانو حکومت په ۲۰۲۲ کال کې د کوکنارو د کرنې او کاروبار پر وړاندې بندیز ولګاوه، چې له امله یې د کوکنارو کر په ۲۰۲۳ کال کې شاوخوا ۹۵ سلنه راکم شو.
د ملګرو ملتونو د معلوماتو له مخې، په ۲۰۲۵ کال کې د کوکنارو کرنه نسبتاً د مخکېني کال په پرتله ۲۰ سلنه نوره کمه شوې او تاریخي ټیټې کچې ته رسېدلې ده. ملګرو ملتونو مخکې ویلي چې د هغو ټولنو ملاتړ کوي چې د کوکنارو د کښت څخه د اوښتو له تګلارې زیانمنې شوې دي.
موضوع: افغانستان کې د نشهيي توکو پر وړاندې مبارزه
سرچینه: Azadi Radio Pashto NEWS
