د خوړو نړیوال پروګرام (WFP) خبر ورکړی چې اروپايي ټولنې افغانستان ته ۱۵ میلیونه یورو ځانګړي کړي دي. هدف یې د اقلیمي بدلونونو پر وړاندې د خلکو مقاومت پیاوړی کول او د خوړو د سیستم ملاتړ دی.
د دې پروګرام په وینا، دغه مالي مرسته به د ښځو او ځوانانو لپاره اقتصادي فرصتونه رامنځته کړي. همدارنګه، دا مرسته به د ښوونځیو د خوړو پروګرام سره هم مرسته وکړي، چې د ماشومانو تغذیه ښه کړي.
د خوړو نړیوال پروګرام په خپل بیان کې ویلي چې دغه پیسې به افغانانو سره مرسته وکړي، څو د اقلیمي بدلونونو له منفي اغېزو سره د مقابلې لپاره چمتو شي. دا اقدام د دوامدارو اقتصادي او معیشتي فرصتونو د رامنځته کېدو لپاره هم زمینه برابروي.
افغانستان د هغو هېوادونو له ډلې دی چې د اقلیمي بدلونونو له امله ډېر زیانمن شوی دی. دغه هېواد په دې وروستیو کې د بشري او غذايي بحران سره مخ دی، چې له امله یې د ملګرو ملتونو په وینا، شاوخوا ۴۰ سلنه افغانان، چې شمېر یې له ۱۷ میلیونو څخه اوړي، د نړیوالو مرستو د کمېدو په صورت کې د خوراکي موادو له سخت کموالي سره مخ کېدای شي.
د اروپايي ټولنې دغه مرسته د افغانستان د خلکو لپاره د امید یوه نوې لاره ده، چې د اقلیمي بدلونونو سره د مبارزې او د اقتصادي ودې په برخه کې مرسته وکړي.
موضوع: اروپايي ټولنې د افغانستان لپاره مالي مرسته
سرچینه: Azadi Radio Pashto NEWS
